Një ëndërr fëmijërore ... Uchacq et Parentis

Simbadi (ulur) mes gjashtë zonjave të fshatit Uchacq et Parentis (Landes - France)
të cilat pas disa ditësh do të marrin pjesë në 'Karnavalet e Venecias' ne Itali …

PERSE E DUA FRANCEN ...

Ja, përse e dua, Francën ! … E dua, ndër të tjera, edhe për disa gjera të vogla në dukje, të cilat ndofta nuk i gjen apo i gjen rrallë në ndonjë vend tjetër të botës. Imagjinoni një çast. Gjashtë gra, gjashtë shoqe nga 38 në 56 vjeç që jetojnë diku në "Francën e thellë", në një fshat të vogël 200 frymësh, mes pyjeve pafund të departamentit të Landes të cilat një dite, vendosin së bashku të shkojnë në “Karnavalet e Venecias” në Itali, për të realizuar kështu një ëndërr të hershme të fëmijërisë së tyre.

… E mërkurë, 23 janar. Prej disa ditësh ndodhem në Mont de Marsan, për xhirime kronikash televizive. Në mëngjes, bashke me Martinën, kolegen time, diskutojmë se çfarë reportazhi mund të bëjmë. E, ndërkohë, bie zilja e telefonit e pas receptorit, dëgjohet zëri i një zonje: Ju flas nga Uchacq et Parentis. Jemi gjashtë shoqe. Kemi përgatitur vetë kostumet dhe do të shkojmë në Karnavalet e Venecias. Po qe se ju duket interesante ideja jonë, ju ftojmë të vini. Subjekt i bukur, të shkojmë ! - i them Martinës - Ketë të xhirojmë sot, e lemë fabrikën e letrës. Ajo është e një mendje me mua. Një telefon në redaksinë qendrore për të marrë edhe aprovimin e saj dhe nisemi drejt atij fshati të vogël, të cilin mezi e gjejmë në hartën e departamentit të Landes.

… Një shtëpi tipike landeze. Përdhese. Mes pyllit me pisha. Me dritare të mëdha. Me ca rraqurina përreth. Brenda e ngrohtë, me një oxhak ku digjen ca busme të trashë. Më duket sikur përjetoj përshkrimet e Balzakut. Gjithçka aty është në lëvizje. Të gjashtë gratë kane veshur tashmë kostumet e tyre fantastike. Një prej tyre, me një maskë të verdhe si ar, më bën fresk me freskoren e saj ekzotike. Rafaela tregon : Ideja na lindi para dy vjetësh. Ishte nje ide pak e çmendur. Vendosem të shkojmë në Karnavalet e Venecias. Dhe nisëm nga puna me një pasion të papërmbajtur. Zgjodhëm copat, ngjyrat, maskat, shallet, pendët, rruazat dhe filluam të qepim kostumet.

… Gjashtë ditë nga nisja drejt Venecias (kryetari i bashkisë u ka venë në dispozicion një mikrobus për vajtje dhe ardhje, më shumë se një mijë kilometra larg nga fshati i tyre), të gjashtë zonjat, të lumtura për realizimin e ëndrrës së tyre, janë në prag të një aventure të mrekullueshme. Një ëndërr e cila po bëhet realitet. Më 1 shkurt, ato do të jenë aty, në Venecian e bukur, të lumtura mes turmës dhe karnavaleve të famshme të këtij qyteti magjik …