Xhim Morrison

      
Varri i Xhim Morison ne Per Lasheze - Fotografuar nga Simbad

         

                               ATY KU PREHET XHIM MORISON

Këtë fundjave isha në Paris e nuk di përse, dëshira ime e parë ishte ti bëja homazh një këngëtari të dashur të rinisë sime, pikërisht Xhim Morrisonit. Pra, shkova në varrezat Per Lashezë, aty ku prehet këngëtari i shquar, vdekur më 3 korrik 1971 nga një overdozë e cila i shkaktoi pushim zemre, (ndërkohë që ishte duke bërë banjë, në apartamentin e tij në rrugën Beautreillis, në lagjen Marais në Paris). Xhim Morrison, ky poet dhe këngëtar i shquar i grupit mitik “Doors”nga Kalifornia, për nga modernizmi i artit të këngës si edhe nga mënyra e jetesës, mishëroi një model absolut për mbarë brezin e viteve '60-'70. Varri i tij është kthyer prej kohesh, në një vend të ëndërruar pelegrinazhi për mijëra të rinj e të reja nga mbarë bota: më të shumtit anglo-amerikanë, gjermanë e skandinavë, të cilët shkojnë aty për t'i bërë homazh idolit të tyre që mbeti simbol i madhërishëm i antikonformizmin ndaj traditave e sjelljeve sociale të kohës së vet ( të tilla si, kundërshtimi i luftës në Vietnam, tutelës prindërore, refuzimit ndaj shërbimit ushtarak, ligjit, familjes, moralit të kohës etj. ).

I shndërruar në një vend takimi ndërkombëtar e, disa herë i kërcënuar edhe për profanim nga individë të rrezikshëm e me probleme psiko-mendore, varri i tij ruhet me kamera të fshehta e vëzhgohet ditë e natë nga roje të posaçme, gjë e cila ka bërë që survejimi të jetë special dhe i përhershëm. Për shkak të fluksit të madh të njerëzve, përreth varrit, shpesh ndodhin edhe incidente. Individë të ndryshëm nuk mungojnë t'a bëjnë të pavdekshme prezencën e tyre, duke shkruar graffiti në varrin e idolit të paharruar, duke derdhur mbi varr shishe me alkool apo duke tymosur hashash e mariuhanë. Grupe të tjerë bien në delir të vërtetë ndërkohë qe pjesa më e madhe e adhuruesve, kënaqen duke vendosur pranë banesës së fundit të artistit të madh, thjesht një pakete cigare, lule apo mesazhe shkruar mbi copa letre. Unë, personalisht, u ndjeva i lumturuar që munda të bej këtë foto në vendin më të vizituar në Paris (i katërti për nga radha) të cilën e shihni, këtu më lart ...

Nga Vasil Qesari

                                                         1943 - 1971